Saturday, January 31, 2009

போர் சித்திரக் கதைகள்!

“நான் பனங்காட்டு நரி, இந்த சலசலப்புக்கெல்லாம் அஞ்ச மாட்டேன்!”

-கவுண்டமணி (படம் – சூரியன்)

வணக்கம்,

தமிழ் கூறும் காமிக்ஸ் நல்லுலகிற்கு அடியேனின் குடியரசு தின மற்றும் தியாகிகள் தின நல்வாழ்த்துக்கள்! ‘வெகுமதி’ போட்டிக்கு விடையளித்த நண்பர் செழியன்-க்கு பாராட்டுக்கள்! பல முறை சரியான பதிலைக் கூறியுள்ள ஒரே நபர் அவர்தான் என்பதால் அவருக்கு சிறப்புப் பரிசொன்று ரகசியத் தபாலில் அனுப்பப் பட்டுள்ளது! பிரித்த ஐந்தாவது வினாடி வெடிக்கும் ஒரு வெடிகுண்டு தான் அது!

“ஹா! ஹா! ஹா!” -(கொடூர, வில்லத்தனமான சிரிப்பு)

கும்மியடிக்கும் ‘போண்டா’, ‘பஜ்ஜி’ மற்றும் ‘கொய்யா’ வாயனுங்களுக்கு ஒரு எச்சரிக்கை! தொடர்ந்து அடுத்தடுத்தப் பதிவுகளிலும் இதேப்போல் வந்து கும்மியடித்தால் விளைவுகள் விபரீதமாக இருக்கும்! கும்மி அடிக்காவிட்டாலோ விளைவுகள் இன்னும் கூட விபரீதமாக இருக்கும்! ஜாக்கிரதை!

அயல்நாட்டு சதி காரணமாகத் தலைமையகத்தில் சில நாட்களாக இனையத் தொடர்பு வசதி துண்டிக்கப் பட்டிருந்தது. கிடைத்த இந்த சந்தில் சிந்து பாடும் கயவர் கூட்டம் குடியரசு தின சிறப்புப் பதிவு இடாததாகக் காரணம் காட்டி என்னை ‘தேசத் துரோகி’ என முத்திரை குத்தி நாடுகடத்த சதித்திட்டம் தீட்டியுள்ளதாக நம்பத்தகுந்த உளவுத்துறைத் தகவல்கள் தெரிவிக்கின்றன!

ஆனால் அ.கொ.தீ.க. தலைவரிடம் நடக்குமா? அயல்நாட்டுச் சதியை அடியோடு அழித்ததுடன் அதிரடியாக ஒரு புதுப் பதிவுடன் உங்களை இதோ மீண்டும் சந்திக்கிறேன்! இதை முன்னிட்டே மேற்குறிப்பிட்டுள்ள கவுண்டரின் ‘பன்ச்’! லேட்டா வந்தாலும் லேட்டஸ்ட்டா வருவோம்ல!

மொக்கை போட்டது போதும், இனி பதிவுக்கு வருவோம்!

குடியரசு தினமென்றாலே நமக்கு நினைவுக்கு வருவது சிறுவயதில் நாம் தூர்தர்ஷனில் கண்டுகளித்த நம் நாட்டு ஜனாதிபதி அன்று பங்கெடுத்துக் கொள்ளும் சிறப்பு நிகழ்ச்சிகளேயாகும். ஜனாதிபதி தேசத்திற்காக உயிர்துறந்த நமது போர்வீரர்களுக்கு மரியாதை செலுத்துதல், கொடியேற்றம், ஜனாதிபதிக்கு முப்படைகளும் வழங்கும் அணிவகுப்பு மரியாதைகள், கொடியிறக்கம் மற்றும் நாளின் இறுதியில் படைகள் கோட்டைக்கு பின்வாங்கும் தாளம் சேர்ந்த அணிவகுப்புக்கள் கண்களில் இன்னும் நிற்கிறது!

இந்தத் தருணத்தில் நமது தமிழ் காமிக்ஸ்களில் வெளிவந்த போர் சித்திரக் கதைகள் பற்றிய சிறப்புப் பதிவொன்றை இடலாம் என்ற எண்ணத்தின் விளைவாகவே இந்த இடுகை! இதற்கு நாம் சரித்திரத்தில் சற்றுப் பின்னோக்கிச் செல்ல வேண்டும்!

போர் சித்திரக் கதைகள் – மூலம்:

முத்துவின் ஆரம்பகால இதழ்களின் மூலங்கள் இங்கிலாந்தின் ஃப்ளீட்வே நிறுவனத்தினர் 1960களில் வெளியிட்ட டைஜஸ்ட் வடிவிலான ஃப்ளீட்வே சூப்பர் லைப்ரரி சித்திரக் கதைகளேயாகும் என்பது நம் அனைவருக்கும் இப்போது பரிச்சயமானதே!

இரும்புக்கை மாயாவி, ஸ்பைடர், ஜானி நீரோ, லாரன்ஸ் & டேவிட் ஆகிய அற்புத கதாபாத்திரங்களை நமக்கு அறிமுகம் செய்து வைத்த புத்தகங்கள் அவை! அதே நிறுவனம் போர் சித்திரக் கதைகளுக்கென்று பிரத்தியேகமாக ஒரு மாதாந்திரப் புத்தகத்தில் இரண்டு சிறந்த தொடர்களை அதே சமயத்தில் வெளியிட்டன.

இரண்டாம் உலகப் போரில் வெற்றி பெற்ற காரணத்தால் இங்கிலாந்தில் எப்போதுமே போர் சித்திரக் கதைகளுக்கு சிறந்த வரவேற்பு உண்டு. கணக்கிலடங்கா பெயர்களில் பல போர் கதைகள் வெளிவந்தன. இவற்றில் சுமார் ரகத்தில் தேறுவது சில கதைகள் மட்டுமே. எண்ணிலடங்கா போர் கதைகளில் நமக்கு பரிச்சயமான சில போர் கதைகளைப் பற்றி மட்டும் இங்கு குறிப்பிடுகிறேன்.

ஃப்ரண்ட்லைன் (FRONTLINE) தொடர் என அழைக்கப்பட்ட அந்தப் புத்தகங்களில் நமக்கு மிகவும் பரிச்சயமான இரண்டு கதானாயகர்களின் சாகஸங்கள் மாதந்தோறும் வெளிவந்தன! அவை MADDOCK’S MARAUDERS மற்றும் SEARGENT IRONSIDE ஆவர்! இவற்றில் MADDOCK’S MARAUDERS-ஐ நாம் லயன் காமிக்ஸ் மூலம் மின்னல் படை என்ற பெயரில் அறிவோம். SEARGENT IRONSIDE-ஐ நாம் சார்ஜண்ட் தாமஸ் என்று அறிவோம்.

Fleetway Super Library - Frontline Series No.1 - Maddock's Marauders Fleetway Super Library - Frontline Series No.3 - Maddock's Marauders - Valley of Silence Fleetway Super Library - Frontline Series No.4 - Top Sergeant Ironside - Trouble Shooter Fleetway Super Library - Frontline Series No.5 - Maddock's Marauders - Blueprint for Treason Fleetway Super Library - Frontline Series No.6 - Top Sergeant Ironside - Bazooka King Fleetway Super Library - Frontline Series No.7 - Maddock's Marauders - Broken Swastika Fleetway Super Library - Frontline Series No.9 - Maddock's Marauders - Fight for A Crown Fleetway Super Library - Frontline Series No.10 - Top Sergeant Ironside - Yesterday's Heroes Fleetway Super Library - Frontline Series No.13 - Maddock's Marauders - Forbidden Zone Fleetway Super Library - Frontline Series No.20 - Top Sergeant Ironside - Hit the Silk Fleetway Super Library - Frontline Series No.25 - Maddock's Marauders - Robot Army

இவை 13 (மின்னல் படை) + 13 (சார்ஜண்ட் தாமஸ்) என மொத்தம் 26 கதைகள் வெளிவந்துள்ளன. இவை யாவும் 132 பக்கங்கள் கொண்ட கதைகள். இவற்றில் மூன்று கதைகள் நமது லயனில் வெளிவந்துள்ளன.

இவற்றின் வெற்றியைத் தொடர்ந்து ATTACK PICTURE LIBRARY எனும் ஃப்ளீட்வே நிறுவனத்தின் மற்றொரு டைஜஸ்ட் வடிவ 64 பக்கங்கள் கொண்ட மாதாந்திர காமிக்ஸில் இவ்விரு நாயகர்களின் சாகஸங்களும் தொடர்ந்து வெளிவந்தன. இதில் மின்னல் படையினரின் லயனில் வெளிவந்த பெரும்பாலான கதைகள் இடம்பெற்றன.

மின்னல் படை:

மின்னல் படை என்பது எவராலும் செய்து முடிக்க இயலா காரியங்களைச் செய்து முடிக்கும் நான்கு தீரர்களைக் கொண்ட அதிரடிப் போர்ப்படையாகும். அவர்கள்-

  • கேப்டன் மாத்யூஸ் (CAPTAIN MATT MADDOCK) – அணித் தலைவர். பிரிட்டனைச் சேர்ந்த மாவீரர், மதியூகியும் கூட. 
  • ஜான் ஸ்மித் (JAN SMIT) – டச்சுக்காரன். மாமிச மலை, சற்றே மந்த புத்திக்காரன்.
  • ஜூல்ஸ் கார்சியா (JULES GARCEAU) – ஃப்ரெஞ்சுக்காரன், அணியின் காமெடியன். எப்பேர்பட்ட கஷ்டத்திலும் எல்லோரையும் சிரிக்க வைத்து துயர்துடைப்பதில் வல்லவன். குறிப்பாக ஜான் ஸ்மித்தின் காலை வாருவதில் இவனுக்கு அலாதி பிரியம்.
  • மிக் பால்ஸ்கி (MICK PAULSKI) – போலந்து நாட்டவன், முன்னாள் அரச வம்சாவழியினன். நாஜிக்கள் தனது நாட்டுக்கு இழைத்த கொடுமைகளுக்காக அவர்களை கிடைக்கும் வாய்ப்புகளிலெல்லாம் பழிவாங்கத் துடிக்கும் இளைஞன். 

லயனில் இதுவரை மின்னல் படையினரின் கதைகள் மொத்தம் 5 வந்துள்ளன. அவற்றை ஒவ்வொன்றாகப் பார்ப்போம்.

  • லயன்#92 – ராக்கெட் ரகசியம்!
  • லயன்#95 – முகமில்லா மாயாவி!
  • லயன்#105 – மரண மண்டலம்!
  • லயன்#112 – லயன் TOP 10 ஸ்பெஷல் – புரட்சிக்கொரு பயிற்சி!
  • லயன்#125 – மேகக்கோட்டை மர்மம்!

லயன்#92 – ராக்கெட் ரகசியம்!

மின்னல் படையினர் லயனில் அறிமுகமான முதல் சாகஸம்!

Lion Comics No.092 - Rocket Ragasiyam -  Cover Lion Comics No.092 - Rocket Ragasiyam -  Minnal Padai - Page 3
லயன்#92 – ராக்கெட் ரகசியம்! - முன்னட்டைப்படம் லயன்#92 – ராக்கெட் ரகசியம்! – பக்கம் 3

ஐரோப்பாவின் தலைசிறந்த ராக்கெட் விஞ்ஞானி ஜெர்மானியர்களின் வசம் சிக்கிக் கொண்டு விட்டார். அவரை உடனடியாக மீட்டாக வேண்டும். படு ஆபத்தான பணி. எனவே, நெஞ்சுரம் மிக்க ‘மின்னல் வீரர்கள்’ வசம் அந்தப் பணி ஒப்படைக்கப்பட்டது. விஞ்ஞானியை மின்னல் படையினர் எப்படி மீட்டார்கள் என்பதே கதை.

Attack Picture Library - Holiday Special (1982) - Back Cover Attack Picture Library - Holiday Special (1982) - Maddock's Marauders - Freedom March
Attack Picture Library - Holiday Special (1982) - Back Cover Attack Picture Library - Holiday Special (1982) - Maddock's Marauders - Freedom March

இக்கதை ஆங்கிலத்தில் ATTACK PICTURE LIBRARY – HOLIDAY SPECIAL (1982)-ல் மறுபதிப்பாக வந்தது. அட்டகாசமான ஆக்‌ஷன் கதை. ஆனால் ஒரே குறை இதன் சைஸ்தான். பாக்கெட் சைஸ் என்ற பெயரில் தீப்பெட்டியை விட சற்றே பெரிய சைஸில் வந்த இக்கதையைப் படிக்க பூதக்கண்ணாடி தேவைப்படும். விலையைக் கட்டுக்குள் வைக்க இவ்வாறெல்லாம் செய்ய வேண்டியதாகிவிட்டது என ஆசிரியர் திரு.S.விஜயன் கூறுவது சப்பைக்கட்டு.

லயன்#95 – முகமில்லா மாயாவி!

பிரிட்டிஷ் இராணுவத் தலைமையகத்தில் புல்லுருவி ஒருவன் ஜெர்மானியரின் கையாளாக செயல்பட்டு வந்ததால் அவர்களுடைய இரகசிய திட்டங்களை எதிரிகள் முன் கூட்டியே தெரிந்து கொள்ள முடிந்தது. இந்த விபரீதமான பின்னணியில், மேலிடத்து உத்தரவின்படி ‘மின்னல் படை’ என்று பெருமையாக பேசப்பட்ட அதிரடிப்படை வீரர்களை யுத்த களத்திற்கு வழி நடத்திச் சென்ற காப்டன் மாத்யூஸ், எதிரிகள் விரித்திருந்த வலையில் வீழ்ந்து, அல்லல் பட்டு… எப்படி தப்பி வந்தனர் என்பதே கதை.

Lion Comics No.095 - Mugamillaa Mayavi - Cover Lion Comics No.095 - Mugamillaa Mayavi - Inner Pages
  லயன்#95 – முகமில்லா மாயாவி! – முன்னட்டைப்படம் லயன்#95 – முகமில்லா மாயாவி! - உள்பக்கங்கள்

80பக்கங்கள் கொண்ட இக்கதை ஒரிஜினலாக 120 பக்கங்கள் கொண்ட FRONTLINE தொடரில் வந்திருக்க வேண்டும். நமது ஆசிரியர் திரு.S.விஜயன் விலைக்குள் பக்கங்களை அட்க்கக் கொண்ட முயற்சியாக படங்களை சுருக்கியிருக்கலாம்.

என்னிடம் இக்கதையின் ஒரிஜினல் இல்லை. ஆகையால் படங்கள் வெளியிட இயலவில்லை. மன்னிக்கவும்!

லயன்#105 – மரண மண்டலம்!

1944ம் ஆண்டு! இரண்டாவது உலகப் போர் முடிவத்ற்கு சில மாதங்களே இருந்த சமயம் அது! நேச நாடுகளின் ராணுவத் தலைமையகத்திற்கு புதிரானதொரு முக்கிய தகவல் வந்தது. அதைத் துப்பறியும் பொறுப்பு “மின்னல் படை” என்று பெருமையாக பேசப்பட்ட அதிரடிப்படை வீரர்கள் வசம் ஒப்படைக்கப்பட்டது..!

Lion Comics No.105 - Marana Mandalam - Cover Lion Comics No.105 - Marana Mandalam - Minnal Padai
லயன்#105 – மரண மண்டலம்! - முன்னட்டைப்படம் லயன்#105 – மரண மண்டலம்! - உள்பக்கங்கள்

80பக்கங்கள் கொண்ட இக்கதையும் FRONTLINE தொடரில் வந்திருக்க வேண்டும். இக்கதையின் ஒரிஜினலும் என்னிடம் இல்லை. மன்னிக்கவும்!

லயன்#112 – லயன் TOP 10 ஸ்பெஷல் – புரட்சிக்கொரு பயிற்சி!

இரண்டாவது உலகப் போரில், நேச நாட்டுப் படைகளிடம் நாஜிகள் சரணடைவதற்கு முன்பே பல இடங்களில் பல தோல்விகளைத் தழுவினார். நாஜிப் படையினரால் அடக்கியாளப்பட்ட ஐரோப்பிய மக்கள் சுதந்திரம் பெறப் போராடினார். அப்படிப்பட்டதொரு நாட்டின் சுதந்திரப் போராட்டத்தில் “மின்னல் படையினர்” என்று அழைக்கப்படும் அச்காய அதிரடிப்படை வீரர்கள் “புரட்சிக்கொரு பயிற்சி” தரும் ஆசான்களாகவும் மாற நேரிட்டது!

Lion Comics No.112 - Lion Top 10 Special  - Cover
லயன்#112 – லயன் TOP 10 ஸ்பெஷல் – அட்டைப்படம்
Lion Comics No.112 - Lion Top 10 Special - Minnal Padai - Puratchikkoru Payirchi
லயன்#112 – லயன் TOP 10 ஸ்பெஷல் – கதை#9 - புரட்சிக்கொரு பயிற்சி!

லயன் TOP 10 ஸ்பெஷலில் 10 கதைகளில் ஒன்றாக வந்த இக்கதை ஒரிஜினலில் 60 பக்கங்கள் கொண்டது. படங்களைச் சுருக்கி 30 பக்கங்களில் க்ரைம் நாவல் சைஸில் லயனில் வந்தது.

Attack Picture Library - Holiday Special (1984) - Cover Attack Picture Library - Holiday Special (1984) - Maddock's Marauders - Patriot Army
Attack Picture Library - Holiday Special (1984) - Cover Attack Picture Library - Holiday Special (1984) - Maddock's Marauders - Patriot Army

இக்கதை ஆங்கிலத்தில் ATTACK PICTURE LIBRARY – HOLIDAY SPECIAL (1984)-ல் மறுபதிப்பாக வந்தது.

லயன்#125 – மேகக்கோட்டை மர்மம்!

ஆஸ்ட்ரிய ஆல்ப்ஸின் மனித நடமாட்டமில்லாத பனிப்பரப்பின் கீழே பிரம்மாண்டமான கோட்டை ஒன்று ஒளிந்து கிடப்பதை ஒரு இத்தாலிய படைப்பிரிவு தற்செயலாக கண்டுபிடித்தது. முற்றுகையிடப்பட்டால் பத்தாண்டுகளுக்கு தாக்குப்பிடிக்கத் தேவையான அனைத்து வசதிகளையும் தன்னகத்தே கொண்டிருந்த அந்த உறுதியான கோட்டை அடால்ஃப் ஹிட்லருக்கும் அவரது மெய்க்காவல் படைக்கும் புகலிடமாகும் வகையில் நிர்மாணிக்கப்பட்டிருந்தது. அதை அழிக்கும் பொறுப்பு “மின்னல் படை”யிடம் ஒப்படைக்கப் படுகிறது.

Lion Comics No.125 - Mega-k-Kottai Marmam - Cover Lion Comics No.125 - Mega-k-Kottai Marmam - Page 5
லயன்#125 – மேகக்கோட்டை மர்மம்! - முன்னட்டைப்படம் லயன்#125 – மேகக்கோட்டை மர்மம்! – பக்கம் 5

64 பக்க ஒரிஜினல் கதை, 40 பக்கங்களில் வந்தது. கூட போனஸாக கேப்டன் பிரின்ஸ் சிறுகதை ஒன்றும் வந்தது. இக்கதை அலிஸ்டர் மெக்லீன் எழுதி, ரிச்சர்ட் பர்ட்டன், க்ளிண்ட் ஈஸ்ட்வுட் இனைந்து மிரட்டிய WHERE EAGLES DARE கதையை தழுவியது என சொன்னால் அது மிகையாகாது.

Attack Picture Library - Holiday Special (1982) - Front Cover Attack Picture Library - Holiday Special (1982) - Maddock's Marauders - The Last Stronghold
Attack Picture Library - Holiday Special (1982) - Front Cover Attack Picture Library - Holiday Special (1982) - Maddock's Marauders - The Last Stronghold

இக்கதை ஆங்கிலத்தில் ATTACK PICTURE LIBRARY – HOLIDAY SPECIAL (1982)-ல் மறுபதிப்பாக வந்தது.

இதர கதைகள்: 

லயன்#67 - எமனுக்கு எமன்!

சார்ஜண்ட் தாமஸ் (TOP SERGEANT IRONSIDE)-ஐ நமக்கு அறிமுகப் படுத்திய அற்புதக் கதை.

Lion Comics No.067 - Emanukku Eman - Cover Lion Comics No.067 - Emanukku Eman - Page 3
லயன்#67 - எமனுக்கு எமன்! - முன்னட்டைப்படம் லயன்#67 - எமனுக்கு எமன்! – பக்கம் 3

ஒரு படைத்தலைவன் தனது வீரர்களை எப்படி வழிநடத்திச் செல்ல வேண்டும் என்பதற்கு உதாரணப் புருஷனாகத் திகழும் சார்ஜண்ட் தாமஸ் ஒரு நாஜி ஜெனரலின் வெறுப்பை சம்பாதித்துக் கொள்கிறார். அவரைப் பழிவாங்க அவரது படைப்பிரிவு எங்கு சென்றாலும் விடாது தாக்குதல் நடத்துகிறான் ஜெனரல் ஹிஞ்சர்மேன். தனது படைப்பிரிவைக் காக்க தனது உயிரை துச்சமாக மதித்து எதிரிகளிடம் சரணடையச் செல்லும் தாமஸைப் பின் தொடர்ந்து வரும் அவரது படைப்பிரிவினர் அவரைத் தடுத்து அவருடன் ஜெர்மானியர்களிடம் சிக்கிக் கொள்கின்றனர். தப்பி செல்லும் அவர்களை பியரி எனும் ஃப்ரெஞ்சுப் புரட்சிப்படை உறுப்பினர் அடைக்கலம் அளித்துக் காக்கிறார். ஆனால் பியரி ஜெனரல் ஹிஞ்சர்மேனிடம் சிக்கிக் கொள்கிறான். மரண தண்டனை அளிக்கபட்டு சாவை எதிர்நோக்கியிருக்கும் பியரியைக் காக்க விரைகிறார் தாமஸ். பியரியை தாமஸ் காப்பாற்றினாரா? விடையை புத்தகத்தைப் படித்துத் தெரிந்து கொள்க.

Fleetway Super Library - Frontline Series No.16 - Top Sergeant Ironside - Dead or Alive - Cover Fleetway Super Library - Frontline Series No.16 - Top Sergeant Ironside - Dead or Alive - Page 3
Fleetway Super Library - Frontline Series No.16 - Top Sergeant Ironside - Dead or Alive - Cover Fleetway Super Library - Frontline Series No.16 - Top Sergeant Ironside - Dead or Alive - Page 3

இந்த அற்புதக் கதை ஆங்கிலத்தில் FRONTLINE தொடரில் வெளிவந்தது. தமிழில் இந்தக் கதையை வெளியிட்ட ஆசிரியர் திரு.S.விஜயனை எவ்வளவு பாராட்டினாலும் தகும். ஆனால் பாக்கெட் (தீப்பெட்டி) சைஸில் வெளியிட்டதால் பாராட்டுக்களைக் கொஞ்சம் குறைத்துக் கொள்ள வேண்டியதுதான்.   

லயன்#69 – புதையலை தேடி...! - எதிரியின் கோட்டையில்…!

ராணுவ ரகசியங்கள் பலவற்றை அறிந்த ஒரு ஆஸ்திரேலிய அரசாங்க ஊழியன் ஜப்பனியர்கள் ஹாங்காங்-ஐ முற்றுகையிட்ட போது கர்னல் வடனாபே எனும் கொடியவனிடம் சிக்கிக் கொள்கிறான். அவனை மீட்க ஒரு விசித்திரப் படை புறப்படுகிறது.

  • ஷங்காய் ஜிம்மி – ஹாங்காங் போலீஸ் துப்பறிவாளர்
  • கடலோடி தாம்ஸன் – கைதி
  • ஃபேபியன் ஸ்மித் – பல்கலைக்கழகப் பேராசிரியர்
  • சார்லி ஸுஸூகி – ஜூடோ பயிற்சியாளர்
  • சார்ஜண்ட் டெட் ஹார்மன் – கமாண்டோ
  • சார்ஜண்ட் ஜிப்ஸி கோல்ஸ் – கமாண்டோ
Lion Comics No.069 -  Pudhayalai Thedi - Cover Lion Comics No.069 - Edhiriyin Kottaiyil
லயன்#69 – புதையலை தேடி...! - முன்னட்டைப்படம் லயன்#69 – புதையலை தேடி...! - எதிரியின் கோட்டையில்…!

இன்னுமொரு அற்புதச் சித்திரக் கதை. ஆனால் மீண்டும் தீப்பெட்டி சைஸ். அட்டையில் உள்ள புதையலை தேடி..! கதை கொசுறாக வரும் ஒரு மொக்கை கதை (மீட்போர் ஸ்தாபனம்). 

Battle Picture Library - Holiday Special - Cover Battle Picture Library - Holiday Special - In Enemy Hands
Battle Picture Library - Holiday Special - Cover Battle Picture Library - Holiday Special - In Enemy Hands

இக்கதை ஆங்கிலத்தில் BATTLE PICTURE LIBRARY – HOLIDAY SPECIAL-ல் மறுபதிப்பாக வந்தது.

ராணி காமிக்ஸ்:

ராணியிலும் சில போர் சித்திரக் கதைகள் வெளிவந்துள்ளன. அனைத்துமே அற்புதமான சித்திரக் கதைகள். நண்பர் ரஃபிக் இவற்றைப் பற்றி விரைவில் பதிவிடக் கூடும் என்பதால் நான் பெரிதாக எதுவும் கூற விரும்பவில்லை. அட்டைப் படங்களை மட்டும் இப்போதைக்கு கண்டுகளியுங்கள்!

  • ராணி#18 – கொலை வாரண்ட்
  • ராணி#26 – ராணுவ ரகசியம்
  • ராணி#48 – கூர்க்கா வீரன்
  • ராணி#397 – அதிரடிப் படை

இவை தவிர லயனில் அதிரடிப் படை, பெருச்சாளிப் பட்டாளம், இரும்புக்கை நார்மன் ஆகியோரின் சாகஸங்கள் வெளிவந்துள்ளன. ஆனால் அவையெல்லாம் தொடர்கதைகளாக வந்தவை. ஆகையால் அவற்றைப் பற்றி வரும் பதிவுகளில் காண்போம்.

வழக்கம் போல உங்கள் கருத்துக்களைத் தவறாமல் பகிர்ந்து கொள்ளுங்கள். ‘எமனுக்கு எமன்’ ஆங்கிலப் பதிப்பு பற்றி தகவல்கள் அளித்த நண்பர் முத்து விசிறி-க்கு நன்றி.

இப்போதைக்கு அவ்வளோதான்,
மீண்டும் சந்திப்போம்!

பி.கு.:

  • தமிழ் காமிக்ஸ் வலைஞர்கள் பலர் தற்போது முன்னோட்டம் போடுவதை வழக்கமாகக் கொண்டுள்ளனர். இது எதிர்பார்ப்பைக் கூட்டி பரபரப்பை ஏற்படுத்துகிறது என்பதை மறுக்க முடியாது. மொக்கை திரைப்படங்களுக்கே பயங்கரமாக ட்ரைலர் போடும் போது நாம் முன்னோட்டம் போடுவதில் எவ்வித தவறுமில்லை எனக் கருதுகிறேன். ஆனால் நான் ஏன் இன்னும் முன்னோட்டம் போடுவதில்லை என்று கேட்டால், அதற்கு எனது உலகப்புகழ் பெற்ற சோம்பேறித்தனமே காரணம் என இங்கு கூறிக் கொள்ள விரும்புகிறேன்.
  • கிங் விஸ்வா உருப்படியாக ஒரு பதிவை இட்டுள்ளார். கொள்ளைக்காரக் கார் நம்மை நமது பள்ளிப் பருவத்திற்கே மீண்டும் அழைத்துச் செல்கிறது.
  • கனவுகளின் காதலர் லயனில் பல காலமாக விளம்பரம் மட்டுமே செய்யப்பட்ட கோட் நேம் மின்னல் பற்றி அற்புதமாகப் பதிவிட்டுள்ளார். சமீப காலமாக அவரது பதிவுகளில் கவிதைப் போட்டி வேறு அறிவித்து அனைவரையும் கவிஞராக்கி கதிகலக்கிக் கொண்டிருக்கிறார். அவரது உப்புக் கடல் பாடல் பதிவையும் படிக்கத் தவறாதீர்.
  • க.கொ.க.கூ. மதியில்லா மந்திரி மற்றும் ரகசிய ஏஜண்ட் ரஜினி (முன்னோட்டம்) பற்றி பதிவுகள் இட்டுள்ளார். ரகசிய ஏஜண்ட் ரஜினி ஆர்வத்தைத் தூண்டுகிறது.
  • ரஃபிக் ராஜா நமக்கெல்லாம் மிகவும் பிடித்த TINKLE கதாபாத்திரங்களான காக்கை காளி, சுப்பாண்டி மற்றும் வேட்டைக்கார வேம்பு பற்றி பதிவிட்டுள்ளார். நம்மை சிறுவயதுக்கே அழைத்துச் செல்லும் இன்னொரு அற்புதப் பதிவு.
  • ப்ரூனோ ப்ரேசில் சிலபல அரிய மினி லயன், திகில் அட்டைப்படங்களை வெளியிட்டு நமது காதுகளையெல்லாம் புகைய வைக்கிறார். படிக்க இங்கே ‘க்ளிக்’கவும்.
  • வேதாள நகரம் விரைவில் முடியப் போகிறதாம். சேதி கேட்ட ‘முடி’சூடிய மன்னர் ஒருவர் ரொம்பவே மகிழ்ந்ததாகப் பட்சி ஒன்று சொல்லியது.

Friday, January 16, 2009

பொங்கல் சிறப்புப் பதிவு!

"பொங்கலோ பொங்கல்! மாட்டுக்குப் பொங்கல்!
இன்னிக்கு சேட்டுக்குப் பொங்கல்!"

-கவுண்டமணி (படம்-ஜெண்டில்மேன்)

வணக்கம்,

தமிழ் கூறும் காமிக்ஸ் நல்லுலகிற்கு தமிழ்/ஆங்கிலப் புத்தாண்டு, தமிழர் திருநாள், தைத் திருநாள், உழவர் திருநாள், திருவள்ளுவர் தினம், தைப் பொங்கல், காணும் பொங்கல், மாட்டுப் பொங்கல் என அனைத்து நன்னாட்களும் இனியதாக அமைய அடியேனின் வாழ்த்துக்கள்! மாவீரன் மாண்டிஜூமாவைப் போல் ‘மஞ்சு விரட்டு’-ம் (யார் அந்த மஞ்சு?) மறத்தமிழர்கள் அனைவரும் வெற்றி மாலை சூட மனமார்ந்த வாழ்த்துக்கள்!

சென்ற பதிவான நடுநிசிக் கள்வன்-க்கு நீங்கள் அனைவரும் அளித்த உற்சாகமான வரவேற்புக்கு நன்றி! உங்கள் பாராட்டுக்களைத் தக்கவைத்துக் கொள்ள என்னால் இயன்றமட்டும் உழைப்பேன்(?!!) என்று இந்தப் புத்தாண்டில் உறுதிமொழி கூறுகிறேன்!

‘வெகுமதி’ போட்டிக்கு விரைந்து விடையளித்த நண்பர் ‘காமிக்ஸ் பிரியன்’ க.கொ.க.கூ.-வுக்கு வாழ்த்துக்கள்! இருப்பினும் அவர் ‘கொலைக்கரம்’ வில்லன் ‘மைக்கேல்’-ன் பெயரைக் கூறவில்லை என்பதால் பாராட்டுக்களைக் கொஞ்சம் குறைத்துக் கொள்ள வேண்டியதுதான்.

இது ஒரு பொங்கல் சிறப்புப் பதிவு என்பதாலும் மொக்கை கொஞ்சம் ஓவராக இருப்பதாலும் இப்பதிவை இரு பாகங்களாகப் பிரித்துள்ளேன்! இப்பதிவை கலைஞர் தொலைக்காட்சியில் பொங்கல் சிறப்புத் திரைப்படமான வீரத்தளபதி ஜே.கே.ஆர்.-ன் ‘நாயகன்’-ஐக் கண்டுகளித்தபின் அதன் பாதிப்பிலிருந்து விலகாமல் எழுதுவதால் நிறையோ, குறையோ எதுவாயினும் அது ‘வீரத் தளபதி’யையேச் சாரும் என்பதைத் தாழ்மையுடன் தெரிவித்துக் கொள்கிறேன்!

மாபெரும் தமிழ் காமிக்ஸ் வலைப்பதிவர் சங்க மாநாடு!

சமீபத்தில் (சனிக்கிழமை, ஜனவரி 10) சென்னையில் மாபெரும் தமிழ் காமிக்ஸ் வலைப்பதிவர் சங்க மாநாடு இனிதே நடைபெற்றது. சென்னையில் நடைபெற்றுக் கொண்டிருக்கும் மாபெரும் புத்தகக் கண்காட்சிக்குச் சென்றிருந்த போது சக காமிக்ஸ் வலையுலக நண்பர்கள் சிலரை ஒரே கூரையின் கீழ் (உண்மையிலேயே) சந்திக்கும் வாய்ப்பு கிட்டியது. நண்பர் கிங் விஸ்வா வெளியிட்டிருந்த புத்தகக் கண்காட்சிப் புகைப்படங்கள் அனைவரது ஆர்வத்தையும் தூண்டிவிட, தற்செயலாக அனைவரும் ஒரே புத்தகக் கடையினுள் (கடை எண் : 35 - இன்ஃபோ மேப்ஸ்) காமிக்ஸ் வேட்டையில் ஈடுபட்டிருக்கும் சமயத்தில் ஒருவரை ஒருவர் சந்திக்கும் வாய்ப்பு அமைந்தது.

கருத்துப் பரிமாற்றங்களும், சூடான விவாதங்களும் நடைபெற்றன என்று நான் இங்கு பொய் சொல்லப் போவதில்லை. நேரில் சந்தித்துக் கொண்டதில்லையே தவிர ஏற்கெனவே அனைவரும் தொலைபேசி மூலம் அறிமுகமாகியிருந்ததால் ஆளாளுக்கு கையில் கிடைப்பதை முந்திக் கொண்டு அள்ளுவதிலே மும்முரமாக இருந்துவிட்டோம். சந்திப்பின் நினைவாக சிலபல அரிய புகைப்படங்களும் எடுக்கப்பட்டன. அவையெல்லாம் அ.கொ.தீ.க.வின் ரகசியப் பாசறையில் பத்திரமாகப் பதுக்கி வைக்கப் பட்டுள்ளன. பொது மக்கள் பார்வைக்குச் சென்றால் எவ்வித நாசவிளைவுகள் ஏற்படக்கூடும் என்று யாராலும் கணிக்க முடியாத காரணத்தால் அவற்றை பரம ரகசியமாக வைத்திருக்க அனைத்துத் தரப்பினராலும் ஒருமனதாகத் தீர்மானம் மேற்கொள்ளப்பட்டது.

காமிக்ஸ் வேட்டையில் சிலபல அரிய பொக்கிஷங்களும் சிக்கின. அவற்றைப் பற்றி விரிவாகப் பின்வரும் பதிவுகளில் காணாலாம். விலை காரணமாக சிலவற்றை ‘ச்சீ! ச்சீ! இந்தப் பழம் புளிக்கும்!’ என ஒதுக்கி விடவேண்டியதாயிற்று (உதாரணம் - BONE). புத்தகக் கண்காட்சி பற்றி புகைப்படங்களுடன் நண்பர் கிங் விஸ்வா இட்டுள்ளப் பதிவைப் படிக்க இங்கே ‘க்ளிக்’கவும். பின்னூட்டங்களையும் தவறாது படிக்கவும்.

மாபெரும் தமிழ் காமிக்ஸ் வலைப்பதிவர் சங்க மாநாட்டில் கலந்துகொண்டோர் விவரம்:

  1. வேண்டப்பட்ட விரோதி திரு.கிங் விஸ்வா அவர்கள் - தமிழ் காமிக்ஸ் உலகம்
  2. சிறுவர் இலக்கிய சிந்தனைச் சிற்பி திரு.அய்யம்பாளையம் லெட்சுமணன் வெங்கடேஸ்வரன் அவர்கள் - காமிக்ஸ் பூக்கள்
  3. தமிழிலும் ஆங்கிலத்திலும் காமிக்ஸ் வலையுலகில் கரைகண்ட கரிகாற்சோ(தோ)ழர் திரு.ரஃபிக் ராஜா அவர்கள் - காமிக்கியல் & ராணி காமிக்ஸ்
  4. வேதாள நகரம் தந்த வியாபார வேங்கை திரு.பங்கு வேட்டையர் (SHAREHUNTER) அவர்கள்
  5. இவர்களுடன், அடியேன் பயங்கரவாதி டாக்டர் செவன் - தலைவர், அ.கொ.தீ.க.

வரத்தவறியோர்:

  1. தமிழ் காமிக்ஸ் வலையுலகப் பிதாமகர் திரு.முத்துவிசிறி அவர்கள் - உலகம் சுற்றும் வாலிபன் போல் இவர் கண்டம் விட்டுக் கண்டம் தாவிக் கொண்டே இருந்ததனால் இவரைத் தொடர்புகொள்ள முடியவில்லை.
  2. அயல்நாட்டு அ.கொ.தீ.க. தலைவர் திரு.கனவுகளின் காதலன் அவர்கள் - இவர் ‘ஜெனீலியா’வுடன் ஜல்சா புரிவதிலும், அதன் காரணமாகத் தனது துனைவியார் திருமதி.நவஜோ மதகுருவிடம் பூரிக்கட்டையில் அடிவாங்குவதிலுமே பிஸியாக இருந்ததனால் கலந்துகொள்ளவில்லை.
  3. ஒலக காமிக்ஸ் ரசிகர் - மொக்கை காமிக்ஸ் (எ) GREATEST EVER COMICS - பயணக் களைப்பைக் காரணம் காட்டி வரத்தவறியதோடு மட்டுமல்லாது அழைக்கப்படவில்லை என்று அவதூறு வேறு கிளப்பிக்கொண்டிருக்கும் இவரை இச்சங்கம் வன்மையாகக் கண்டிக்கிறது!
  4. காமிக்ஸ் பிரியர் - க.கொ.க.கூ. - இவரு யாருன்னே தெரியல! அதனால அழைக்கக்கூட வழியில்ல!

சிறப்பு விருந்தினர்கள்:

  1. லக்கிலுக்
  2. தமிழ்குட்டி

‘டேய்! அடப் பாவிகளா! அஞ்சு பேரு கூடி நின்னு மொக்கை போட்டுட்டு, அதென்னங்கடா அது, மாபெரும் தமிழ் காமிக்ஸ் வலைப்பதிவர் சங்க மாநாடு?’ எனக் கேட்போருக்கு நான் ஒன்றை கூறிக் கொள்ள விரும்புகிறேன்! நானும் நண்பர் கிங் விஸ்வாவும் ஃபோனில் பேசிக்கொண்டாலே அதுதான் பொதுக்குழு கூட்டம்! கூட ‘கான்ஃபரன்ஸ்’-ல் நண்பர்கள் அய்யம்பாளையத்தார், பங்கு வேட்டையர், ரஃபிக் ராஜா, கனவுகளின் காதலன், முத்து விசிறி, ஒலக காமிக்ஸ் ரசிகர் என இவர்களில் யாரேனும் ஒருவர் இருந்தாலுமே அது பேரணி! அப்போ அஞ்சு பேர் ஒரே இடத்துல கூடுனா அது மாநாடுதானே?

இது ஒரு சிறந்த மொக்கைப் பதிவாக மாறிக் கொண்டிருப்பதால் இத்துடன் நிறுத்திக் கொண்டு இந்தத் தலைப்பிலிருந்து விலகி அடுத்த தலைப்புக்குச் செல்வோம்.

பொங்கல் மல(ர்)ரும் நினைவுகள்!

சமீபத்தில் நண்பர் ‘கனவுகளின் காதலன்’ இட்டிருந்த தமிழ் காமிக்ஸ் வலையுலகின் முதல் மங்கா பற்றிய பதிவில் இந்தப் பொங்கலுக்கேனும் பொங்கல் மலர் வருமா என வினவியிருந்தார். அதன் விளைவாகவே இந்தப் பதிவு.

பொங்கலுக்கும் தமிழ் காமிக்ஸிற்கும் நிறையவே சம்பந்தம் உண்டு. இந்தத் தைத்திருத் திங்களில் தான் தமிழ் காமிக்ஸ் உலகம் மூன்று/நான்கு புதுவரவுகளைச் சந்தித்துள்ளது. 1972-ல் முத்து, 1986-ல் திகில், 1987-ல் மினி & ஜூனியர் லயன் எனப் பொங்கலன்று நமது வாழ்வில் மேலும் மகிழ்ச்சி பொங்க வைத்த வெளியீடுகள் அவை. இவற்றில் திகில், மினி & ஜூனியர் லயன் ஊத்திமூடப் பட்டுவிட்டாலும் முத்து மட்டும் தொடர்ந்து வெளிவந்து சாதனை படைத்துக் கொண்டிருக்கிறது.

திகில்#001 மினி லயன்#001 -  துப்பாக்கி முனையில் முத்து#001 – இரும்புக்கை மாயாவி ஜூனியர் லயன#001 - சூப்பர் சர்க்கஸ்

இது மட்டுமல்லாது ‘முத்து’வில் முன்னொரு காலத்தில் புத்தாண்டு/பொங்கல் சிறப்பு மலர்கள் வெளிவரும். காலண்டர் போன்ற இலவச இனைப்புகளும் வழங்கப்பட்டது. பின்னர் முத்து மாதமிருமுறை வெளிவந்த போது புத்தாண்டு மற்றும் பொங்கல் மலர்கள் தனித்தனியாக ஆண்டு தோறும் வெளிவந்தன. லயனிலும் சில பொங்கல் மலர்கள் வெளிவந்தன. சில அட்டைப்படங்களை மட்டும் வெளியிட்டுள்ளேன். பார்த்துப் பரவசமடையுங்கள்!

முத்து#010 – நடுநிசிக் கள்வன் முத்து#022 - இயந்திரத்தலை மனிதர்கள் முத்து#046 - வைரஸ்-X முத்து#058 - முகமூடி வேதாளன் முத்து#086 - சூனியக்காரியின் சாம்ராஜ்யம் copy முத்து#132 - தவளை மனிதர்கள் முத்து#181 - கண்ணீர்த் தீவில் மாயாவி

இப்போதெல்லாம் காமிக்ஸ் வந்தாலே நமக்கெல்லாம் பொங்கலும், தீபாவளியும் ஒருசேர வந்ததைப்போல் இருக்கிறது. இந்நிலை மாற எல்லாம் வல்ல ஆசிரியர் திரு.S.விஜயன் அவர்கள் மனசு வைத்தால் மட்டுமே முடியும். லயனுக்கு மட்டும் ஆண்டு மலர் வருடம் தவறாது (அது கூட சந்தேகம்தான்) வெளியிடும் அவர் முத்துவில் பல வருடங்களாக சிறப்பு வெளியீடுகள் எதையுமே வெளியிடவில்லை. பொங்கல் சிறப்பு வெளியீடு இடுவதால் ஆண்டு/பொங்கல் மலர் என ஒரே கல்லில் இரண்டு மாங்காய்கள் அடிக்கலாமே! நடக்குமா?!!

லயன்#013 - கொலைப் படை லயன்#013 - மர்மத் தீவு லயன்#021 - மனித எரிமலை லயன்#033 - பழி வாங்கும் பாவை

ராணியில் வெளிவந்த பொங்கல் மலர்கள் மொத்தம் ஐந்து. அவற்றில் திரு.ராமஜெயம் அவர்கள் ஆசிரியராகப் பணியாற்றியப் பொற்காலமாகிய நான்காண்டு காலத்தில் வருடந்தோரும் பொங்கல் மலர்கள் வந்தன. வழக்கமாக ஜனவரி 16-31 என்று தேடியிடப்பட்ட இதழ்கள் ‘பொங்கல் மலர்’ என வெளிவரும். ஆனால் ராணி உச்சத்திலிருந்த போது பொங்கலுக்கு இரு நாட்கள் முன்பே நமது கைகளில் புத்தகங்கள் இருக்கும். அதுமட்டுமின்றி தமிழர் திருநாளான பொங்கல் மலரில் ‘இன்ஸ்பெக்டர் ஆசாத்’, ‘இன்ஸ்பெக்டர் கருடா’ போன்ற இந்திய கதாநாயகர்களே இடம்பிடித்திருப்பர். பொங்கலுக்கு அடுத்த இதழான ஃபிப்ரவரி 1-15 காமிக்ஸில் ஜேம்ஸ் பாண்ட் இடம்பிடித்திருப்பார். ஒரு வேளை ‘காதலர் தினம்’ சிறப்பிதழில் ‘காதல் மன்னன்’ 007 சாகஸம் புரிவதே சிறப்பு என திரு.ராமஜெயம் கருதியிருக்கலாம்.

Kollai Koottam Issue No 38, Jan 16 1986 Marana Dhandanai Issue No 62, Jan 16 1987 Poonai Kan Manithan Issue No 109, Jan 1 1989 Puthaandu Virundhu Issue No 86, Jan 16 1988 Visithira Vimanam Issue No 14, Jan 16 1985

அவருக்குப்பின் திரு.அ.ம.சாமியால் ஒரேயொரு பொங்கல் மலர்தான் வெளியிடப்பட்டது. அதுவும் திரு.ராமஜெயம் அவர்கள் முன்கூட்டியே வெளியிடத் திட்டமிட்டிருந்திருக்க வேண்டும். ஆனால் அந்த இதழ் (பூனைக்கண் மனிதன்) ஜனவரி 1-16-ம் தேதியில் வழக்கம் மாறி வெளிவந்தது. ஆறாவது ஆண்டிலிருந்து ஜனவரி இதழ்களில் பொங்கல் மலர் என்று குறிப்பிடப் பட்டிருக்காது.

வழக்கம் போல உங்கள் கருத்துக்களைத் தவறாமல் பகிர்ந்து கொள்ளுங்கள். ராணி காமிக்ஸ் பற்றிய சுவையான தகவல்கள் அளித்த நண்பர் ‘கிங் விஸ்வா’வுக்கு நன்றி.

இப்போதைக்கு அவ்வளோதான்,
மீண்டும் சந்திப்போம்!

பி.கு.:

  • ராணி காமிக்ஸ் ரசிகர்கள் பலர் நமது வலைப்பூக்களைத் தொடர்ந்து படித்து வருவது தெரிந்த விஷயமே. அவர்களுக்கு ஒரு வேண்டுகோள். தொடர்ந்து ராணி காமிக்ஸ் பற்றிப் பதிவிடுமாறு என்னை தயவுசெய்து வற்புறுத்தாதீர்கள். தமிழ் காமிக்ஸில் வெளிவந்த பொங்கல் மலர்கள் பற்றிய பதிவை பூர்த்தி செய்வதற்காகவே ராணி பொங்கல் மலர்களைப் பற்றி எழுதியுள்ளேன். ராணி மீது எனக்கு அவ்வளவாக நாட்டமில்லை என்பதோடு, ராணி காமிக்ஸ்-க்கென்று நண்பர் ரஃபிக் ராஜா பிரத்யேகமாக வலைப்பூ ஒன்றை வேறு ஆரம்பித்திருக்கிறார் என்பதால் ராணியிலிருந்து நான் விலகியே நிற்கப் போகிறேன். ராணி பொங்கல் மலர்களைப் பற்றி நண்பர் ‘ரஃபிக்’ விரைவில் தனது வலைப்பூவில் பதிவிடுவார் என எதிர் பார்க்கிறேன். காமிக்கியல்-லிலும் அவர் தொடர்ந்து பின்னிக் கொண்டிருக்கிறார்.
  • க.கொ.க.கூ. ‘டேஞ்சர் டயபாலிக்’ பற்றி சிறப்பு பதிவொன்று இட்டுள்ளார்.
  • கனவுகளின் காதலன் தமிழ் காமிக்ஸ் வலையுலகில் முதன்முறையாக மங்கா பற்றிய பதிவிட்டுள்ளார். படித்து மகிழுங்கள்.
  • கிங் விஸ்வா வழக்கம் போல செய்திதாள்களிலிருந்து பதிவுகளை சுட்டுப் போட்டு தான் ஒரு சிறந்த ‘பலாப்பழ சோம்பேறி’ என்பதை நிரூபித்துக் கொண்டிருக்கிறார். தகவல்களை முந்தித் தருவது தமிழ் காமிக்ஸ் உலகம்  தான் என்று மீண்டுமொருமுறை நிரூபித்திருக்கிறார். யோவ்! சீக்கிரமா ஏதாவது காமிக்ஸ் பதிவு போடுமய்யா!
  • ப்ரூனோ ப்ரேசில் லயன் காமிக்ஸ் அடிக்கடி வராததாலும், லயன் ஆசிரியர் வாசகர் கடிதங்கள் படிக்கிறாரா/பிரசுரிக்கிறாரா என்று சந்தேகம் எழுவதாலும் தொடர்ந்து தனது கருத்துககளை தனது முதலைப் பட்டாளம் வலைப்பூவில் இட்டுக்கொண்டிருக்கிறார். ஆசிரியர் திரு.S.விஜயன் அவர்கள் கவனிக்க!
  • செந்தழல் ரவி புத்தகக் கண்காட்சி பற்றி பதிவிட்டுள்ளார். ரொம்ப நாளாகத் துயில்கொண்டிருந்த தமிழ் காமிக் வலைப்பூ மீண்டும் உயிர்த்தெழுந்துள்ளது!
  • முத்து விசிறி, அய்யம்பாளையத்தார், பங்கு வேட்டையர், ஒலக காமிக்ஸ் ரசிகர், சித்திரக்கதை இவர்களையெல்லம் கொஞ்ச நாளாய் ஆட்களையே காணோம். வேதாள நகரம் தூங்குவதால் கொஞ்சம் நிம்மதியாக உள்ளது! 

தொடர்புடைய இடுகைகள்:

'முத்து'வின் முதல் இதழ் - 'இரும்புக்கை மாயாவி':

‘மினி லயன்’-ன் முதல் இதழ் - ‘சூப்பர் சர்க்கஸ்’:

‘வைரஸ்-X’ பற்றி ‘முத்து விசிறி’-யின் பதிவு:

‘நடுநிசிக் கள்வன்’ பற்றிய பதிவு:

‘டெக்ஸ் வில்லர்’ ப்ற்றி ‘முத்து விசிறி’யின் பதிவு:

‘சென்னை புத்தகக் கண்காட்சி – 2009’ பற்றிய இடுகைகள்: